Muqdisho (Allbanaadir) – Hey’adda Sirdoonka iyo Nabad Sugidda Qaranka ee NISA ayaa baahisay sawirka Yuusuf Maxamed Xuseen oo si weyn ay ugu raad-joogto, kaas oo ah sarkaal sare oo ka tirsan Khawaarijta Al-Shabaab.
War-saxaafadeed ka soo baxay NISA ayaa qofkii ninkaas xog ka keena loogu balan-qaaday in la sii doono abaalmarin lacageed oo gaareysa soddon kun oo doolar ($30,000).
Ninkaan ayaa caan ku ah magaca Jeeri-Carab, wuxuuna ka tirsan yahay xafiiska qaraxyada Al-Shabaab, sida lagu sheegay qoraalka NISA.
“Horjoogahaan wuxuu Khawaarijta masuul uga ahaa qaraxyada, sahminta goobaha bartilmaameedka ah iyo weerarada is-miidaaminta ah ee ay Khawaarijtu ka fulin jireen gobolka Banaadir,” ayaa lagu yiri qoraalka NISA.
Jeeri-Carab ayaa ka soo qeyb qaatay weerarro argagixiso oo ka dhacay magaalada Muqdisho, kuwaas oo ay ka mid yihiin qaraxyadii ka dhacay Villa Rosa, Aqalka Dowladda Hoose, Pearl Beach, SYL Hotel, Beach View iyo weeraradii ka dhacay maqaayadaha Sayidka, Jawi Coffee, Blue Sky, Top Coffee iyo School Polizio.
“Ciidanka NISA oo gacanta kusoo dhigay inta badan dhagar-qabeyaashii la shaqeynayay Jeeri-Carab, gaadiidkii ay adeegsan jireen iyo xubno ka mid ah qoyskiisa ayaa weli si dhaw ula socda dhaq-dhaqaaqa horjoogahan, isagoo maalmihii ugu dambeeyay ku dhuumaaleysanayay nawaaxiga deegaanka Mubaarak ee Gobolka Shabeellaha Hoose,” ayaa lagu yiri qoraalka NISA.
Ugu dambeyntii NISA ayaa lacag badan dul-dhigtay madaxa sarkaalkaas halista ah ee weerarrada badan ka geystay Muqdisho, waxaana lasoo bandhigay lambarro uu kala xiriiri karo NISA qofkii hela xogta ninkaas.
“Muwaadin haddii aad heyso xogta dhagar-qabahan la wadaag Hay’adaha amniga, sidoo kalana ku guuleyso abaalmarin lacageed oo gaareysa Soddon kun oo doolar ($30,000) Waxaad la soo xiriiri kartaa lambarada hoos ku xusan: 199 ama +252770747474 ama +252620545454,” ayaa lagu yiri qoraal ay baahisay hey’adda NISA.
