Washington (Allbanaadir) – Hay’adda xuquuqda aadanaha ee lagu magacaabo Amnesty International ayaa si weyn u cambaareysay tallaabada Kongareeska Mareykanka.
Tallaabadan ayuu Kongareeska ugu codeeyay in cuna-qabatayn lagu soo rogo xubnihii warqadda waaranka u jaray ra’iisul wasaaraha Israa’iil iyo wasiirkiisii hore gaashaandhigga.
Amnesty International ayaa sheegtay in tallaabadaan ay tahay mid lagu raad baabi’inayo xasuuqa Israa’iil ay ka geysatay magaalada Gaza oo ay ku dishay dad badan kuwaas oo u badan haween, carruur iyo dad da’ ah.
Waxa ay hay’addu xoojisay oo dhinac istaagtay qaraarkii maxkamadda dambiyada caalamiga ah ee ICC oo ahayd in lasoo qabto ra’iisul wasaaraha Israa’iil Benjamin Netanhayu iyo wasiirkiisii hore ee wasaaradda gaashaandhigga.
Hay’addu waxa ay soo jeedisay in aan la raad duugin dhabbaha loo marayo caddaaladda maadaama maxkamadda dambiyada caalamiga ah ee ICC ay howsheedu tahay soo qabashada iyo ciqaabidda dadka xad-gudubka geystay.
Sababta uu Mareykanka uu u hor istaagayo amarka maxkamadda ICC waa in aanay xisaab dib ugu soo noqon sabab la xiriirta in hubka ay ku gumaaday dadkaas shacab ah ay bixisay xukuumadda Washington sida ay xaqiijiyeen ilo kala duwan.
Koofur Afrika iyo dalal badan oo qaarkood reer Yurub ah ayaa kiiskaan u gudbiyay maxkamadda ICC oo dhageysi iyo dabagal kadib xaqiijisay in dacwadda lagu soo oogay ra’iisul wasaare Netanyahu iyo wasiirka gaashaandhigga oo markii dambe warqad soo qabasho ah loo jaray.
