Boosaaso (Wararka Maanta) – Madaxweynaha maamul goboleedka Puntland, Saciid Cabdullaahi Deni iyo wafdi uu hoggaaminayo ayaa maanta ku wajahan gudaha magaalada Boosaaso ee xarunta gobolka Bari, halkaas oo laga dareemayo qaban qaabada soo dhaweyntiisa.
Saciid Deni ayaa magaalada Boosaaso ka bilaabi doono dhaq-dhaqaaqyo culus iyo kulamo looga arrinsanayo xaaladaha ka jira magaaladaasi.
Sidoo kale ilo wareedyo lagu kalsoonyahay ayaa innoo sheegay in qorshaha ugu wayn ee Deni iyo tagistiisa Boosaaso ay la xiriirta dardar-gelinta dagaalka ka dhan ah kooxda Daacish ee ku sugan dhulka buuraleyda ah ee gobolka Bari.
Ilo ku dhow madaxtooyada Puntland ayaa sheegay in madaxweynuhuu uu hoggaamin doono abaabul culus oo kooxda lagu qaadi doono, si looga saaro dhulka Puntland gaar ahaan buuraleeyda Cal-madaw iyo Cal-miskaad oo ay ku dhuumeystaan.
Dhowaan ayaa Puntland ay sheegtay in ay soo afmeeri doonto kooxahaasi oo ay ku jiraan rag ajaaniib ah oo ka barbar dagaalanta, halisna ku ah amniga Puntland iyo guud ahaan dalka.
Dhinaca kale safarka Deni ayaa kusoo aaday, xilli haatan Boosaaso ay ka taagan xiisad culus oo u dhexeyso ciidanka PSF iyo Puntland, taas oo ka dhalatay isku haysiga garoonka diyaaradaha magaalada Boosaaso oo dhowaan digniino kasoo sareen ciidamada PSF.
Xiisadda ayaa si weyn looga dareemaya magaaladan oo ah xarunta ganacsiga Puntland oo ay horay labada dhinac ugu dagaalameen kadib khilaaf soo kala dhex galay.