Tel Aviv (Wararka Maanta) – Ra’iisul wasaaraha Israa’iil ayaa ku baaqay in xaaladda la dejiyo kaddib markii dibadbaxayaal ay ku jiraan siyaasiyiinta midigta fog ay xoog ku galeen laba saldhig oo milatari.
Benjamin Netanyahu ayaa sheegay inuu “si adag u cambaareynayo” rabshadaha. Dibad-baxayaasha ayaa ka careysnaa xariga loo geystay askar lagu eedeeyay inay si xun ula dhaqmeen maxbuus Falastiini ah.
Warbaahinta Israa’iil ayaa ku warameysa in maxbuuska Falastiiniga ah ay faraxumeeyeen ciidamada Israa’iil.
Israa’iil ayaa beenisay eedeymaha kooxaha xuquuqul insaanka ee ku aadan in dagaalyahanada Xamaas ee gacanta u galay ciidamada Israa’iil ay la kulmaan tacadiyo loogu gaysto xabsiga.
Koox ka tirsan ciidamada kaydka Israa’iil ayaa lagu soo waramayaa in ay hubkooda dhiibeen kadib markii la xiray, waxaana ay diideen in ay sii wataan shaqadooda.
Dhinaca kale, Israa’iil ayaa isku diyaarineysa inay jawaab deg-deg ah ka bixinayso weerar dhinaca cirka ah oo ay ku eedeysay ururka Xisbullah ee ka dhisan Lubnaan.
Xisbullah ayaa iska fogaysay masuuliyadda weerarkan oo lagu laayey illaa 12 caruur ah, kaas oo ka dhacay dhulka ay Israa’iil haysato ee ku yaalla buuraha Golah Heights.
Diyaaradaha dagaalka ayaa bilaabay inay duqeeyaan Koonfurta Lubnaan, iyaga oo sheegaya inay qaadayaan weeraro aargudasho ah, hase ahaatee Israa’iil ayaa intaas ku daraysa inay weli qorshaynayso jawaab xooggan.
