Ceelwaaq (Wararka Maanta) – Wararka naga soo gaaraya Gedo ayaa sheegaya in saacadihii lasoo dhaafay dowladda Soomaaliya ay gobolkaasi gaysay ciidamo milatari ah oo dhaq-dhaqaaqyo ka bilaabay halkaasi, taas oo loo arko tallaabo milatari oo ka dhan ah Jubbaland.
Ciidamadan oo ka tirsan qeybta 43-aad ee Xoogga dalka ayaa gaaray degmada Ceelwaaq ee gobolka Gedo, halkaas oo lasoo wariyay inay fariisimo cusub ka sameysteen halkaasi.
Saraakiil ka tirsan milatariga ayaa sheegay in ciidamada halkaasi loo geeyay inay qaadaan duulaan ka dhan ah Al-Shabaab, iyaga oo diiradda saaraya qaybta koonfureed ee dalka.
Wararka ayaa intaasi kusii daraya in dib-u-dejinta ciidamada aan lagu wargelin Jubbaland oo haatan khilaaf xoogleh uu kala dhexeeyo dowladda federaalka Soomaaliya, kaas oo ka dhashay sida loo wajahayo doorashooyinka dalka.
Arrintan ayaa u muuqata in dowladdu qaadeyso tallaabo milatari oo ka dhan ah Jubbaland, waxaana sida oo kale horay u sameeyay Farmaajo oo ciidamo ku qabsaday gobolka Gedo.
Xaaladda ayaa haatan ah mid aad u kacsan, waxaana gobolka laga dareemayaa dhaq-dhaqaaqyo ka dhashay ciidamada ay dowladda dhexe geysay aagga degmada Ceelwaaq.
Dhanka kale, ma jiro wax hadal ah oo kasoo baxay dhinaca Jubbaland oo ku aadan dhaq-dhaqaaqa milatari ee ay dowladdu ka bilowday gobolka Gedo.
Si kastaba, arrimahan ayaa kusoo aadayo, kadib markii ay guul darreysteen dadaallo dhex-dhexaadin ah oo ay garwadeen ka ahayd dowladda Kenya, si la’isugu soo dhaweeyo Villa Soomaaliya iyo maamulka Jubbaland, mana jiro illaa iyo hadda wax kasoo naasa cadaaday.