Guriceel (Wararka Maanta) – Warar kala duwan ayaa kasoo baxaya muwaadiniin Itoobiyaan aha oo maanta dil iyo dhaawac loogu geystay gudaha magaalada Guriceel ee gobolka Galgauud.
Ilo wareedyo lagu kalsoon yahay ayaa Wararka Maanta u sheegay in nin ku labisan dareeska ciidamada milatariga uu rasaas ku furay goob ay ku sugnaayeen muwaadiniintaasi u dhashay Itoobiya, gaar ahaan qowmiyadda Oromada, waxaana soo gaaray dhimasho iyo dhaawac.
Inta la xaqiijiyay waxaa goobta ku dhintay ugu yaraan 1 qof oo Itoobiyaan ahaa, halka uu ku dhaawacmay mid kale oo la geeyay goob caafimaad oo ku taalla magaaladaasi oo hoostagta maamul goboleedka Galmudug.
Sidoo kale wararka ayaa intaasi kusii daraya in Itoobiyaanka ku sugnaa goobta ay aruurinayeen biro, gaar ahaan birta ka sameysan maarta, sida ay innoo sheegeen qaar kamid ah dadka deegaanka.
Ninka falkan gaystay ayaa lasoo wariyay inuu goobta ka baxsaday, mana jiro wax war ah oo weli kasoo baxay mas’uuliyiinta degmada iyo saraakiisha laamaha ammaanka.
Horay ayaa la sheegay in loogu digay Oromada ku sugan Guriceel, waxaana hanjabaadyo ay kala kulmayeen maleeshiyaad deegaanka ah.
Xaaladda magaalada ayaa deggan, waxaana laga war sugayaa talaabada ay qaadaan maamulka iyo hay’adaha amniga Guriceel.