Beirut (Wararka Maanta) – Duqeymaha cirka ee Israel ayaa lagu dilay ugu yaraan 95 qof guud ahaan Gaza Khamiistii shalay.
Inta badan dhibanayaasha ayaa ahaa dad rayid ah oo ku sugnaa waqooyiga go’doonsan ee deegaankaas, sida ay illo-wareedyo caafimaad u sheegeen Al Jazeera.
Caasimadda Lubnaan ee Beirut waxaa habeenimadii xalay lagu garaacay ugu yaraan 10 weerar oo cirka ah oo ay ka dambeeyaan Israel, waxaana la soo sheegayaa in ay jirasasn khasaarooyin kala duwan.
Dhinaca kale, Qaramada Midoobay ayaa sheegtay in saacadihii u dambeeyay ciidamada Israel ay beegsadeen nidaamka caafimaadka ee Gaza iyo bartilmaameedyo kale oo Lubnaan ah.
Warbixinta cusub ee QM ayaa sheegaysa in Israel ay samaysay siyaasad wadajir ah oo lagu burburinayo nidaamka daryeelka caafimaadka ee Gaza oo ay ku jiraan weerarada ula kac ah ee lagu qaadayo shaqaalaha caalamiga ah iyo xarumaha caafimaadka.
Afar shaqaale ajnabi ah iyo saddex Israel ah ayaa lagu dilay gantaallo kala duwan oo ay Xisbullah ku garaaceen waqooyiga Israel, taasi oo ah maalintii ugu dhimashada badneyd muddo bilo ah.
Gaza waxa lagu dilay ugu yaraan 43,204 Falastiiniyiin ah iyo dhaawaca 101,641, halka gudaha Lubnaan lagu dilay ugu yaraan 2,865 qof dhaawacana uu gaarayo 13,047.