Muqdisho (Wararka Maanta) – Madaxweyne Xasan Sheekh Maxamuud oo laba sano iyo bar xilka haya ayaa sii wada inuu dib u qurxiyo dhaqanadii qalafsanaa ee nidaamkii hore ee Maxamed Cabdullaahi Farmaajo.
Madaxweynaha wuxuu horey u haystay saddex arrimood oo taban oo uu kala mid noqday Farmaajo tan iyo markii xukunka kusoo laabtay 15-kii May 2022.
Waxay kala yihiin saddexdii uu horey usoo barbareeyay iyo midda haatan;
1. Dastuur ku tumashada
Labada madaxweyne ee isku beddelay xukunka Villa Soomaaliya midkoodna ma ixtiraamin dastuurkii lagu doortay.
Farmaajo waxaa lagu xasuusta muddo kororsigii sharci darrada ahaa ee Xamar dagaalka galiyay. Xasan Sheekh-na hadda waa iska diiday inuu baarlamaanka mariyo heshiisyadii uu soo galay sida uu dastuurka qabo, wuxuuna sidoo kale muddo kororsi sharci darro ah siiyay maamul goboleedyada.
2. Baarlamaan curyaamin
Madaxweyne Xasan Sheekh wuxuu muddo xileedkii hore ahaa nin baarlamaanka macno ugu fadhiyo, laakiin hadda muddo xileedkiisan cusub isagoo xiganaya sidii uu Farmaajo u damiyay baarlamaanka, isna sidaas oo kale ayuu kasoo qaaday.
Wax ay diidi karaan ama sixi karaan ma jiraan baarlamaanka. Labada ninba waxay curyaaminta baarlamaanka u adeegsadeen dhaqaale iyo xilal bixin.
3. Siyaasadeynta socdaalka
Labada nin ee Xasan Sheekh Maxamuud iyo Maxamed Cabdullaahi Farmaajo wuxuu mid walba hor istaagay muwaadiniin Soomaaliyeed oo ka aragti duwan iyaga, kuwaas oo loo diiday inay ka baxaan garoonka diyaaradaha ee magaalada Muqdisho, iyagoo u socday isla gudaha dalka.
Madaxweyne Xasan Sheekh isagoo horey saddexdaasi ugu barbareeyay Farmaajo ayaa haatana qodob afaraad ku barbareeyay shalay, waana in lagu fashilmay isku haynta dalka, gaar ahaan maamul goboleedyada.
Madaxweynihii hore ee Maxamed Cabdullaahi Farmaajo intii ugu badneyd muddo xileedkiisi ma haysan Puntland iyo Jubbaland, haatana Xasan Sheekh ayaa go’aanno ku gaaray shir ay ka maqan yihiin labadaasi maamul.
Horey waxaa u maqneyd Somaliland. Qofka madaxda ka ah Soomaaliya mid kamid ah waxyaabaha ugu waaweyn ee lagu qiimeynayo waa isku haynta dalka. Xasan Sheekh maanta ma hayo Somaliland, Puntland iyo mana hayo Jubbaland.
Tani waxay ka dhigan tahay inuu sidii Farmaajo isna ku fashilmay isku haynta dalka iyo isku wadka bulshada Soomaaliyeed. Ma jiro fashil ka weyn boobka hantida qaran ee ka socda magaalada Muqdisho iyo in la isku hayn waayay dalkii.
Wax walba oo madaxweyne Xasan Sheekh ku dhaqaaqo maanta ma wada saameynayaan dalka, waa wax deegaano gaar ah ku eekaan doona, taas oo haddii lagu sii adkeystana halis galin doonta midnimada guud ee umadda Soomaaliyeed.