Muqdisho (Allbanaadir) – Wasiirrada shaqada ee dowladaha Soomaaliya iyo Sacuudiga ayaa bishii December ee sanadkii hore kala saxiixday heshiis dhigaya in Soomaaliya shaqaale u dirto dalka Sacuudiga.
Wasiirka Shaqada iyo Arrimaha Bulshada JFS Soomaaliya Yuusuf Maxamed Aadan ayaa sheegay in labada dal ay ku heshiiyeen in nidaam ka duwan kuwii hore ee shaqaalaha Soomaalida loogu diri jiray Sacuudiga hadda loo maro, kaas oo waafaqsan shuruucda shaqaalaha ee caalamiga iyo kuwa labada dal u yaalla.
“Dowladda Soomaaliya waxay Sucuudiga u direysaa shaqaale cusub, markii hore waa loo diri jiray, inkasta oo uusan ahayn heshiis rasmi ah, khaladaad badan ayaa dhici jiray oo dadkii meesha la geeyo aysan xaquuqdodi helin, kufis iyo qaladaad kale oo badan ayaa jiray, hadda wixii ka horeeyey wasaaraddu door kuma lahyen,” ayuu yiri wasiir Yuusuf Maxamed Aadan.
Wasiirka ayaa sidoo kale sheegay in qaladaadkii laga galay shaqaalaha Soomaalida ah ay keentay liiska Shirkadihii qaladaadas sameeyey ay dowladda u soo gudbisay safaaradda Soomaaliya, taasi oo keentay in labada dal ay galaan heshiis rasmi ah oo lagu dhowrayo xuquuqda shaqaalaha.
Wuxuu intaa raaciyey in xilligii hore ay shirkado si gaar ah loo leeyahay oo labada dal ka shaqeeya ay iyagu lahaayeen doorka shaqaalaha Soomaalida ee loo dirayo Sacuudiga, balse shirkadaha Soomaalida ee howshaas qabanayey ay ahaayeen kuwo sharciyo ka haysta wasaaraddda shaqada iyo arrimaha bulshada Soomaaliya.
“Shirkaddo Sacuudi ah ayaa heshiis la gali jiray kuwa Soomaaliya jooga, marka kuwa Soomaalida ah ayaa dadka ay raadsanayeen Sacuudiga gaynayey, taas hadda meesha waa ka baxaysaa, waxaana arrimahaan toos uga wada shaqeynaya labada dowladood,” ayuu yiri Wasiirka Shaqada Soomaaliya.
Guddiyo labada dhinac ah iyo wasaaradda ayuu sheegay wasiir Yuusuf inay la soconayaan hubinta in dadkaas ay ku shaqa galayaan nidaamka heshiiska.
“Markii hore waxaa dadku ku shaqayn jireen laba shaqo oo ah darawalnimo iyo xamaali, basle hadda waxaa loo furay in dadka Soomaaliyeed ku shaqayn karaan sida dadka dalalka kale xirfado ku shaqayn karaan,” ayuu yiri Wasiirka Shaqada iyo Arrimaha Bulshada Soomaaliya.
Wuxuu sidoo kale sheegay in hadda heshiiskan dhigayo in dadka sharciyadooda ay haynayaan shirkadaha Sacuudiga ee u xilsaaran shaqo gelinta, halka xiligii hore ay ka qaadi jireen dadka ay u shaqaynayaan.
“Dadku inta aysan bixin waxaa la barayaa xaqa uu leeyaha, xaqa lagu leeyahay iyo nidaamka Sacuudiga, Wasaaraddu waxay magacowday u qaabilsane, qof kasta xogtiisa waa haynaa,” ayuu yiri wasiir Yuusuf.
Wuxuu intaas raaciyey in qofka shaqaalaha la cadayn doono xaqiisa iyo mushaaarkiisa inta uusan ka bixin Soomaaliya, “Qofku maba baxaayo wasaaradda ayaa haysa heshiiska,” ayuu yiri wasiir Yuusuf.
Sidoo kale wasiirka ayaa sheegay in la dhisay nidaam App ah oo qofka u ogolaanaya inuu cabashadiisa ku soo gudbiyo haddii uu dhibaato kala kulmo halka uu u shaqaynayo, kaas oo ay helayaan safaaradda Soomaaliya ee Sacuudiga iyo wasaaradda shaqada iyo arrimaha bulshada Soomaaliya.
“Qofka waxaa la gey doonaa Sacuudiga, inta uu joogo dalkaas mushaarkiisa ayuu qadanayaa, isagoon nus doollar ka isticmaalin oo wadankiisa ku soo celin karaa, caymis caafimaad ayuu leeyahay, fasax caafimaad ayuu leeyahay, gunno ayuu leeyahay, siddeeed saacadood ayuu shaqaynayaan, cunnadiisa iyo meesha uu seexanayo qofka uu u shaqaynayo ayaa laga rabaa,” ayuu yiri wasiirka shaqada iyo arrimaha bulshada Soomaaliya Yuusuf Maxamed Aadan.
