Ugu yaraan 29 Falastiiniyiin ah ayaa lagu dilay laba weerar oo kala duwan oo Israa’iil ay ku qaadday xeryo barakac oo ku yaalla gobolka Rafah Talaadadii maanta, sida ay sheegeen wasaaradda caafimaadka ee Gaza iyo guddiga xaaladaha degdegga ah ee gobolka Rafah.
Weerarkii ugu horreeyay ayaa dhacay abbaare 3-dii subaxnimo Talaadadii (waqtiga maxalliga ah) xerada Tal al-Sultan ee galbeedka Rafah, markii weerar lagu qaaday saddex teendho, sida ay sheegeen dadka deegaanka iyo weriyaha CNN ee Rafah. Ugu yaraan siddeed qof ayaa la dilay oo loo gudbiyay isbitaal ku yaalla xerada Tal Al-Sultan, sida ay sheegeen guddiga.
Xerada Tal al-Sultan waxay ku dheggan tahay bakhaar Qaramada Midoobay leedahay, kaasoo darbiyadiisu ay waxyeelo ka soo gaartay duqeynta sida uu muujinayo muuqaal laga soo duubay.
Xerada la weeraray Talaadadii ayaa qiyaastii 150 mitir u jirta xero kale oo barakac ah oo ay Israa’iil duqaymo iyo dab ku dhufatay laba maalmood ka hor, halkaasoo ay ku dhinteen ugu yaraan 45 qof ayna ku dhaawacmeen in ka badan 200 oo kale.
Muuqaal laga soo duubay dhulka ayaa muujinaya dad barakacayaal ah oo burburinaya hab nololeedkoodii ku meel gaarka ahaa ee xerada Tal al-Sultan, isla markaana urursanaya alaabtoodii oo ka daad-guraynaya aagga iyaga oo wata baabuur iyo gaari-dameerro.
Weerarkii labaad ayaa dhacay galabnimadii Talaadada maanta ah waqtiga maxaliga ah markii Israa’iil ay weerar ku qaaday xero barakac oo ku taal koonfurta xeebta ee Al-Mawasi, halkaasoo ay ku dhinteen ugu yaraan 21 qof oo ay ku jiraan 13 haween ah, ayna ku dhaawacmeen ugu yaraan 64 qof 10 kalena ay xaaladoodu liidato, sida laga soo xigtay. Wasaaradda Caafimaadka ee Gaza.