Home Xogta Dahsoon Wararkii ugu dambeeyey ee doorashada Aqalka Sare ee ka dhaceysa BAYDHABO maanta

Wararkii ugu dambeeyey ee doorashada Aqalka Sare ee ka dhaceysa BAYDHABO maanta

Wararka laga helayo deegaanada Koonfur Galbeed ayaa sheegaya in maanta doorashada shan kursi oo ka mid ah sideeda Senator ee ka imaanaya maamulkaasi lagu dooran doono gudaha magaalada Baydhabo ee xarunta gobolka Baay.

Qaban qaabadii ugu dambeysay ee qabashada doorashada ayaa haatan ka socota Baydhabo, waxaana si weyn loo adkeeyey amniga guud ee magaaladaasi.

Doorashadan ayaa waxaa ku tartamaya illaa 10 musharrax oo uu liiskooda soo gudbiyey madaxweyne Cabdicasiis Lafta Gareen, waxaana saddex ka mid ah yihiin dumar.

Guddoomiyaha guddiga doorashooyinka Koonfur Galbeed Yuusuf Cabdulqaadir Maxamed ayaa ka warbixiyey u diyaar garowda doorashada, wuxuuna tilmaamay in 10-ka musharrax ay buuxiyeen shuruudihii laga rabay, isla-markaana la mariyey baarista hubinta dambiyada.

Sidoo kale wuxuu intaasi ku daray in ugu horreyn musharraxiinta laga dhageysan doono khudbado, kadibna la guda-geli doono qabashada doorashada.

“10-ka musharrax waxa ay buuxiyeen shuruudihii waxaana ay mareen baarista hubinta dambiyada, ilaa haatan wax kiis ah oo naloo soo gudbiyay ma jiro, sidaas awgeed waxa ay ka wada qaybgalayaan doorashada maanta” ayuu yiri Yuusuf Cabdulqaadir Maxamed.

Koonfur Galbeed ayaa noqoneyso maamulkii labaad ee bilaaba doorashada Golaha Aqalka Sare, waxaana ka horreeyey oo kaliya dowlad goboleedka Soomaaliyeed ee Jubbaland.

Maamullada harsan ayaa sidoo kale looga fadhiyaa inay dadajiyaan qabashada doorashada Aqalka Sare, si loo bilaabo tan Golaha Shacabka, waxaana kusii xigta mida madaxweynaha.

 

Source link