Kim Jong Un oo ku hanjabay adeegsiga hub Nukliyeer




Pyongyang (Allbanaadir Media) – Hoggaamiyaha Kuuriyada Waqooyi Kim Jong Un ayaa sheegay in dalkiisa “diyaar u yahay inuu Nukliyeer isku difaaco” haddii mustaqbalka isku dhac militari uu dhexmaro ayaga iyo Mareykanka iyo Kuuriyada Koonfureed.

Washington iyo Seoul ayaa marar badan ka digay in Pyongyang ay diyaarineyso inay fuliso tijaabadeedii toddobaad ee Nukliyeer, tallaabadaas oo Mareykanka ay ka digeen inay horseedi doonto jawaab “deg deg ah oo xoog badan.”

Khudbaddii ugu dambeysay ee Kim uu jeediyo ee lagu xusayey heshiiskii lagu soo afjaray Dagaalkii Korea, taasi oo Kuuriyada Waqooyi looga yaqaan “Maalinta Guusha”, ayuu ku sheegay in ciidamada dalkiisa “ay sii buuxda diyaar ugu yihiin” xasarad kasta.

“Ka hortagga dagaal Nukliyeer ee dalkeena waa u diyaar in la abaabulo, waana awood xooga badan,” ayuu Kim ku yiri khudbadda uu jeediyey Arbacadii oo ay baahisay wakaaladda wararka rasmiga ah ee Pyongyang ee KCNA.

Kim oo munaasabadda 69 guurada dhammaadkii dagaalkii 1950-53 kula hadlayey askartii ka qeyb gashay ayaa adkeeyey “u diyaar ahaanshaha dalkiisa ee inuu meel iska saaro Mareykanka haddii ay isku dhacaan.”

Hanjabaadda Kim ayaa imaneysa ayada oo Kuuriyada Koonfureed iyo Mareykanka ay sare u qaadeen dhoolatusyada militari ee mar kasta ka careysiiya Kuuriyada Waqooyi maadaama Pyongyang ay u argato isku diyaarin duulaan ka dhan ah.

Dhinaca kale, Kim ayaa weerar afka ah ku qaaday madaxweynaha cusub ee Kuuriyada Koonfureed Yoon Suk-yeol oo xukunka la wareegay bishii May, kaasi oo wacad ku maray inuu mowqif adag ka qaadan doono Pyongyang.

“Ka hadalka tallaabo militari oo ka dhan ah dalkeena oo leh hub dhameystiran oo ah kan ay ugu cabsida badan yihiin waa nacasnimo waana ficil halaag nafsi ah,” ayuu yiri Kim oo ka hadlayey maamulka Yoon oo uu ku calaameeyey koox “burcad ah.”

“Isku dayga halista ah ee noocaas oo kale waxaa deg deg u ciqaabi doono awooddeena, islamarakaana dowladda Yoon Suk Yeol iyo militarigiisaba waa la baabi’in doonaa.”

VOA + AFP



Source link