Home Xogta Dahsoon Hussein Sheikh Mohamud ayaa cadeeyay sababta looga reebay tartanka Aqalka Sare

Hussein Sheikh Mohamud ayaa cadeeyay sababta looga reebay tartanka Aqalka Sare

Xuseen Sheekh Maxamuud oo kamid ahaa Xildhibaannada Aqalka Sare ee Afartii sano ee la soo dhaafay ayaa shalay laga reebay Musharixiinta Aqalka Sare oo uu soo gudbiyay Madaxweynaha Koonfur Galbeed Cabdicasiis Xasan Maxamed laftagareen.

Hayeeshee Xuseen Sheekh Maxamuud ayaa Maanta waxaa uu faah faahiyay sababaha keenay in laga reebo u tartamid sanadkaan kamid noqoshada Xildhibaannada Aqalka Sare.

Qoraal uu soo dhigay bartiisa Facebook ayuu ku sheegay in ka aragti duwanaansha Madaxda joogta Villa Soom aaliya darted looga reebay, balse weli uu u adeegi doono Shacabkiisa.

Hoos Ka Akhriso Qoraal Dheer oo uu Maanta soo dhigay bartiisa Facebook.

Bismillaahi,

Marka Koowaad mahad oo dhan Alle ayay u sugnaatey, marka xigtana waxaan u mahadcelinayaa dhammaan shacabka Soomaaliyeed meel walba oo ay dunida ka joogaan taageerada iyo dhiirigelinta ay ila garab istaagnaayeen.Si gaar ah waxaan ugu mahadcelinaa shacabka Koonfur Galbeed oo aan ku matalayay Aqalka sare muddo xileedkii la soo dhaafay. Insha Allah waxaa la gaari doonaa waqti rabitaankiinu shaqeeyo kuna doorataan matalayaashiina siyaasadda.

Muddadii aan u soo adeegayay shacabka Soomaaliyeed gaar ahaan kuwa Koonfur Galbeed waxaan ku dadaaley wixii karaankeyga ah inaan si daacadnimo ku jirto ugu adeego, una doodo xuquuqaha siyaasadeed iyo kuwo bulsho, anigoo ka tirsanaa Guddiga la socodka iyo hirgelinta dastuurka ee labada Aqal. Dadaal weyna aan ka gaystay howshaas wali qabyada ah.

Intaas ka dib, waxaan aaminsanahay Qadarta Rabbi iyo in Alle SWT uu bixiyo Mulkiga doonistiisana wax lagu helo waxna lagu waayo, haddii ay insaanka oo dhan wax kula doonaana ay ku xiran tahay un doonista Alle. Qalinka waxaa haysta mas’uul siyaasi ah oo heshiis siyaasadeed fursad loogu siiyey inuu kala doorto gaar ahaan kuraasta Aqalka Sare ee Baarlamaanka 11aad. Cabbirka fikirka madaxbannaan ee dhaqanka ii ahaa muddo xileedkii la soo dhaafay, ayaan aaminsanahay inay sabab u ahayd in la iga reebo tartanka Aqalka Sare ee xilligan.

Insha Allah waxaan balanqaadayaa in waayidda xilkii xildhibaanimo ee BFS aaney saameyn ku yeelan doonin mabaadii’deyda ku dhisan in daacad loogu adeego shacabka Soomaaliyeed anoo xil haaya iyo anigoon hayninba. Waxaan uga mahad celinayaa shacabkii iyo masuuliyiintii aad u jeclaa inaan mar kale tartamo, waxaanna ugu baaqayaa inay is dejiyaan.

Mahadsanidiin,

 

Source link