Muqdisho (Wararka Maanta) – Dowladda federaalka Soomaaliya ayaa war rasmi ah kasoo saartay hubkii shalay lagu bililiqeystay deegaan hoostaga magaalada Caabudwaaq ee waqooyiga gobolka Galgaduud, kaas oo u gacan galay maleeeshiyaad deegaanka ah.
Warsaxaafadeed kasoo baxay wasaaradda amniga gudaha ayaa waxaa lagu sheegay in hay’adaha amniga ay la socdeen hubkaas, waxayna sheegtay inay si sharci darro ah dalka kusoo galiyeen ganacsato, balse markii laga war helay kadib ay gacanta ku dhigeen ciidamada ammaanka ee ku sugan aagga gobolka Galgaduud.
“Hay’adaha amniga DFS oo si joogta ah ula socda isku dayada hubka sida sharci darrada ah loo soo geliyo dalka ayaa waxay maalintii shalay ay gacanta kusoo dhigeen hub kooxo ka ganacsata hubka sharci darrada ah kasoo geliyeen dhinaca Itoobiya oo ku beegan gobolka Galgaduud” ayaa lagu yiri warsaxaafadeedkan oo kasoo baxay wasaaradda amniga gudaha.
Dowladda Soomaaliya waxa ay intaasi ku dartay in ciidamada amniga oo la wareegay gawaarida ay waddada usii galeen maleeshiyaad hubeysan, kadibna ay u suuragashay inay la wareegaan qaar kamid ah hubka, sida ay ku caddeysay warsaxaafadeedkeeda.
“Laamaha amniga ayaa marka ay gacanta hubka kusoo dhigeen ayaa waxaa jidgooyo u dhigtay maleeshiyaad hubeysan, taasina waxay sababtay in hubka qaar kamid ah uu gacanta u galo maleeshiyaadkaasi” ayaa lasii raaciyay qoraalka
Waxaa kale oo ay dowladdu sheegtay in haatan ay waddo dadaallo dheeraad ah oo lagu soo celinayo hubkaasi, waxayna ugu baaqday odayaasha deegaanka inay gacan ku siiyaan ciidamada howlgallada ka wada halkaasi, si loo soo qabto maleeshiyaadka.
Ugu dambeyn waxa ay dowladda dhexe sheegtay in tallaabo adag ay ka qaadi doonto cid kasta oo ku lug yeelataa falkaasi oo halis ku ah amniga guud ee Soomaaliya.
Si kastaba, xaaladda degmada Caabudwaaq ayaa weli kacsan, inta badan dadka ku nool degmadaas ayaa waxaa gacanta u galay hub aad u badan, waxaana Caabudwaaq iyo deegaanada ku hareereysan ka taagan colaado qabaa’il, xitaa beesha Mareexaan ee degta Caabudwaaq ayaa jifo-jifo u dirirta.
